MELC Delhi Agra Advent Christmas Tour

New Delhi, Nov. 16: Manipur Evangelical Lutheran Church, Delhi hattuom te’n Nov. 16 ni’n Agra ah Advent Christmas Tour vapei uhi. Secy. Pu Bruce K. Thangkhal apat report kimu dan in Bus khat in kitawl suh ua, Agra Taj Mahal ah kipawllimna leh mun leh muol etna va nei uh chithu kija hi. More Pics here

MELCD ADVENT CHRISTMAS CUM TOUR 2010
“Ngai un, Unaute kituoh diil diel a umkhawm anah hoiin, nuom hina va-ia e” – Late 133.1

– Tv. Bruce K. Thangkhal,
Secretary, MELC Delhi

Delhi MELC in Nov 16 ni’n Advent Christmas cum Tour hattuom memberte lah ah ki-ittuoh semna ding tupna in kinei hi.
Nov 16 zingmawng nai 6 in Munirka a kisuh khom chiat ahi a, MELCD Secretarypu’n kizahsah di poimote gennna nei a, tuozohin, Pastor Lalpu in thumna nei in ‘Taj Mahal’ umna Agra khopi lam zuon in kahing kuon ta uhi.

Sawtlouin gilna chi’n Tv Neithang Taithul in Nh nurse Naomi kung ahing zuon a, tuomin Naomi’n zong a damdawi bawm ‘first aid’ ahing hongkhia a, mipite’n thakhat in lamdang kisah hi. Lung muonna khat ahing pie hi.

Tawmlou kalin Delhi pulam ahing hita a, ka peina uh lampi (NH-2) a lungleen huoi dandan chu gendi bei vawt. Lampi gei a sing sang pipi leh zaanglou lian pipi a um a, Manipur lam a kizin mah abang koi a, khenkhat mittui val kilkel phiel in um uhi. Himini zingkal guovai a phi’n a, a vawt hiuhieu sim, a lungleen huai dieh hi.

9.37 in ‘Mathura 33 km’ aki chi a, Taj Mahal a nai hita va ka chi ua. Gingtat sang in ana gamla hi. Mathura khuo katuon uhi. Mathura kichi naza ngai ei? Mathura khu U.P. state a Yamuna tuipi pang a um, India Hindute pasian Krishna pianna khuo ahi. Tuoleh Krishna nautuol kaina khuo ‘Gokul’ umna ahi hi. Delhi – Mathura 145 km leh Mathura – Agra 54 km. Delhi-Agra ki kal tate gel hi mai.

Lampi la bei thei mawng mawnglou. Dah 11.15 in signboard khatah: ‘Welcome to Agra’ kici ka mu ua, ki tungta chia kipah sengseng ka khut ka be’ng uhi. Agra sung hinanleh Taj Mahal khu km 17 in ana gamla nalai hi!

Taj Mahal zuon a ka tai lai un, St. John’s College and Agra Red Fort kichi ka gal mu malam uhi. Tami College khu Church Missionary Society (England) te’n 1850 a ana phu uh ahi. Agra Red Fort, tam kulpi khu km 2.5 a sau, suangsan (red sandstone) a kibawl khu Mughal Le’ngte kulpi ahi. Le’ngpa Shah Jahan in 1628 a ana bawl ahi.

12.20 in bus stop tawpna ka tung uhi. Tv Upau leh Secypu’n ticket 48 ava la ngal uhi. Gintatloupi’n counter a semtute’n: “Bang gam ahing kipan na hi uoi?” ana chi koi uhi. Ticket-te tankim in kang kihawm dildiel uhi. Khenkhat in ahing kipuo ann akineh ua, khenkhat in nehna ding hotel zong in kibuoi ngal uhi.

Atawptawp in lampi gei a restaurant khat ah mi 38 kaki henglut ua, touna teng ka luodim bei uhi. Ahi’n ann nehzou te’n Taj Mahal lam a delh ngal ua, agil kiel pawl ann ngah in a tou phingpheng uhi. Dah 1.55 in kiman sieng pan hi. Sum kang pieh chiet mah uleh manager-nu chu kipah e, tazen!

Amasa pawl pen Nh Naomi ina ana lamkai a, a lastte khu Tv Paulun leh Secypu’n lawi hawl in a hing hawl toutou ta uhi.

Taj Mahal gate tun masang teng lampi gei a dukan dimvawt. I mel a mu uleh, van lei dia hing kichial moh, themkhat chileh hing zou dehta uh e! 1000 man nasan 150 a muthei moh ahi cia! Pilvang uo?

A gate a security guardte’n gamdang dia hing gingmo nlai un, passport umlou in ahing lutsah pai kei ua, tawmkhat kaki nial zoh un ka lutthei hamham uhi.

Taj Mahal huongsung kang tung uh chu… I mit in Taj Mahal hoina hing mu panpan in, a hoina hing kilang semsem ta mai hi. Camera neite’n chu zial uh e, a neiloute’n zong zial veve. Mi tengteng lim kila a buai hilel. Bangzieh ade aw? Tomlou kalin kaki mansuoh sieng uhi. A mun nuom-le-thupi sengseng koima ka kidon khanon sih uhi. I ut utna lam a kipei sieng hi mai!

Taj Mahal tahtah sung kang lut ta ua, khedap sutkhiat ngai, a koiman Rs 10 ahilouleh asan a tuomna khat ah Rs 20 man um hi. Kava koi khata uhi theimasa loupi’n. Kang lutta petma ua, Pi Mumtaz Mahal (Le’ngpa Shah Jahan ji) kivuina han mit in kava muta uhi. Tami Taj Mahal lailung sung a um, a ente’n siki, makhai, a ngap zahzah uh a khie sousou mai uhi. Kalungsim ah, aw hisum teng missionary fund ding hile maw, ka chi hi.

Pu Shah Jahan leh Pi Mumtaz kivuina han a um hi. Mi la lim toh buai, koula apawt na ding zawng a buoi. Gintatloupi’n Taj Mahal sung pen a miel a, light bangma umlou hi.

Tomkhat zouin kaloipan, “A tahtah ana diai?” ang chi a. Gen di dan ka theizou sih hi.

Taj Mahal khu Mi 20,000 val in kum 22 sung a lam nuo in 1648 in zaw ana hi hi. Tam khu Pi Mumtaz kivui na han maimai ahi. Leitung a sillui minthang lawi ahi. Apasal in a it sengseng man a ama theizingna ana lam ahi.

Mumtaz sihni 17-06-1631 tuoleh Shah Jahan sihni 22-01-1666. Taj Mahal nuolam ah Yamuna tuipi a luong a, amu kha zousiehin lim kila na din a a’mla uhi!

4.15 in ka kisuhtuoh zou hamham uhi. Tuochi’n akin theipen in ‘goup photo’ ka kila uhi, themkhat chileh kila manlou dehtah nalai ung e. Tami khu kou adia ka hunzah uh nukhie pien ahing suoh ta hi.

4.52 in Nh Naomi’n Mangpa kungah kipathu tun in lungkituoh tahin innlam kang naw ta uhi. Kigim nanleh, nuom akisah a, lam tungtawn in khat-le-khat kihoulim in, hun nuomtah in kizangh hi. Lam tuobang a saupen a beilam nasan kiphaw lou in ki um hi. Khenkhat pe’n ataw uh khaam sengseng in a dinthaw ua, khenkhat lah limlah in gari sung a abuai vachiei hi. Anop na khat hiveve.

Lamkal a zun thah hun zong ka nei uhi. Bus tai zou sawtlouin mi ka kisim uleh, thakhat in Tv Upau umlou chi ka thei ua, ka pataau ua, gari deiverpu ku’a brake man in ka chi ngal uhi. Tuo kalin khat in a nualang seat kava et uleh, iloipa kho pholou in ana ki-imut dipdep hi.

Tuo hiva, koula a naupang pen George Pausianlal (kha 18) ahing khanglou zieh. Tami nau melhoitah khu kou a dia ka nausen neihsun uh ahi.

Delhi ki tunlam zong a kithei man sih a, kilehlam a tomzaw ahing bang hi. Dah 10.28 pm in Secypu’n kipathu genna leh Khristmas-le-Kumtha zahdan ding pulahna nei in, Pr Lalpu’n thumna nei in utlou pumpum in mangpha ka hing vaikha tau hi. A nop dan a peite’n gen mangmaw vawt. Itna zal a tami tour kibawl ahi.

PS: Delhi MELC in a music project uh Keyboard YAMAHA (PSR-S550-Model) Rs 35,575 man in Nov 7 (Sunday) ni’n MELCD chairman T. Zamlungmang leh Finance Secretary T. Zangminlal in lei uhi. Tuoni kikhop ah Pr Lalpu’n alatna nei a, tuozou in Pastorpi Niengzadim leh Nh Nomi in Pasian phatna la sa ua, Pa T Zangminlal Zou in keyboard tum hi. Biehinn kaitawp in alopna’n singpi dawnna nei uhi. Nov 13 apat in MELCD khanglai mi 6 in keyboard tumdan master Tv L. Pauzamung Ngaihte instructor-na nuoi ah zil pan ta uhi.