MELC Delhi in Upa Enzakap suunna nei

New Delhi, Jan 26, 2011 [SECY/MELCD]: Zani nitah 8 pm in MELC Delhi hattuom te’n Nh. Biakhoih pu Upa Enzakap (f/o Upa Nengmang, Simveng) zilkal dah 4 vel a muolliam lusuuna, Munirka a um a tunu Biakhoih leh Siasiam-te inn ah nei uhi. Tami hattuom hun ah MELC Secretary Bruce K. Thangkhal in conductor hina la in, Nh. Naomi Haumuanching in Pasian kungah thumna nei in hun pat in um hi. Tuazou in Chairman T. Zamlunmang Zou in Bible sim in hanthonna thu hoihtah gen hi. Tuoban ah Pastorpi Niangzadim in zong hanthonna tomkim gen a, lusuuna tuoh innlam a um Upa Nengmang te innkuon leh Delhi a um Biakhoih leh anau a din thumna nei hi. Programme zohin niangtui dawn khawmna nei in hattuom mi-le-sate’n Biakhoih te unau hasawtna thu kikuppih uhi. Mi 50 val kisutuoh khawm hi.

Tuozou in khanglaite’n Nh. Naomi leh Tv. Jonathan lamkaina’n lapawl ‘2nd MELCD Anniversary’ (6 March, tentative) a sah ding la nih zil suoh ngal uhi.