Pastor in Muanlal leh Hohoi pindan in gawm

New Delhi, Jan 9, 2011 [SECY/MELCD]: North Delhi a um Pa Tungnung Ginmuanlal (Imphal) leh Nu Lamneihoi Manlun (tulel a govt nurse sem, Zouveng) te’n MELCD hattuom ah January 8, 2011 (Saturday) ni’n Pindan ah kigawmna uhi. Pastor T. Kamsuanlal in hattuom sung a Pindan a kigawm masapen a tepteh gawmna nei hi. Mounu Lamneihoi leh Moupa Ginmuanlal te’n mipite mitmuh a Kitenna Khupsip kibulsah tuoh uhi. Pastorpa’n Pasianthu hoitah toh peikhawmte thumopna nei a, mounu-le-moupa gualzawlna thumna phuiteng sam hi. Tam hun pen mun lemzaw Pa TZ Zou inn, Munirka ah nitah 8.30 PM in LCC member-te leh lawm-le-gual te’n uop uhi. Program zaw in Mounu-le-Moupa’n hattuom lamkaite tungah kipahthu tutna’n annkuang lui a, mipi peikhawm teng in lundamtah mai in annkuang kisohpi chiet hi.